कोल्हापूर : दि. १०,
देशातील एचआयव्ही संसर्गितांचे आकडेवारी आटोक्यात आणण्यासाठी मिशन एड्स सुरक्षा अभियान देशभर चालू आहे. एच.आय. व्ही. चे 95:95:99 हे उद्दिष्ट साध्य करण्यासाठी शासकीय स्तरावर प्रयत्न चालू असून जिल्ह्यातील खासगी डॉक्टर्सनी त्यांच्याजवळ एच.आय.व्ही. औषधोपचार घेत असणाऱ्या रुग्णांची सांख्यिकी माहिती शासनाला दिल्यास हे उद्दिष्ट साध्य होण्यासाठी मदत होणार असल्याने सर्व खाजगी डॉक्टर्सनी ही माहिती शासनास सादर करावी असे आवाहन जिल्हाधिकारी डॉ. विजय राठोड यांनी केले. जिल्हा एड्स नियंत्रण समितीची त्रमासिक सभा जिल्हाधिकारी कार्यालयात संपन्न झाली. यावेळी ते बोलत होते. निवासी वैद्यकीय अधिकारी डॉ. रेश्मा पाटील, जिल्हा कार्यक्रम अधिकारी दीपा शिपूरकर प्रमुख उपस्थित होते.
प्राथमिक आरोग्य केंद्रासह सर्व शासकीय रुग्णालयांमध्ये गरोदर मातांची एच.आय .व्ही. तपासणी व्हायला हवी, एड्स नियंत्रणामध्ये काम करणाऱ्या सामाजिक संस्थांचा आढावा घेण्यात यावा,जिल्ह्यातील नवीन एच.आय.व्ही. संसर्गितांची आकडेवारी घटलेली असून मिशन एड्स सुरक्षा व इंडेक्स तपासणी अभियान प्रभावीपणे राबवावे अशा सुचना जिल्हाधिकाऱ्यांनी दिल्या.क्षयरोगाची तपासणी लवकरात लवकर केल्यास रुग्णाला त्याचा फायदा होणार असल्याने क्षयरोग तपासणी करण्यावर भर देण्याच्या सुचनाही त्यांनी केल्या.
जिल्हा कार्यक्रम अधिकारी दीपा शिपुरकर यांनी जिल्ह्यातील एड्स नियंत्रणाच्या कामाचा आढावा सांगून गेल्या काही वर्षांच्या तुलनेत नवीन एच.आय.व्ही. संसर्गितांची आकडेवारी आटोक्यात येत असल्याची सांगितले. यावर जिल्हाधिकाऱ्यांनी समाधान व्यक्त केले.
यावेळी वैद्यकीय अधिकारी डॉ.सुशांत रेवडेकर,डॉ. तेजल जाधव, शहर क्षयरोग अधिकारी डॉ.रूपाली यादव,जिल्हा माहिती अधिकारी फारुख बागवान,सहाय्यक प्रादेशिक परिवहन अधिकारी नीता सूर्यवंशी- पाटील, क्लस्टर अधिकारी रमेश वर्धन,डॉ. ऋतुजा कदम, डॉ.वर्षा काळे,डॉ. सूर्यकांत खारगे, यांच्यासह अधिकारी कर्मचारी व स्वयंसेवी संस्थांचे प्रतिनिधी उपस्थित होते.
